చంద్రబాబుకు ఎయిమ్స్ లేక ఏఐజీ లో ట్రీట్మెంట్ ఇవ్వాలి

నరసరావుపేట: అకారణంగా జైల్లో బంధించిన మాజీ ముఖ్యమంత్రి చంద్రబాబు ఆరోగ్య పరిస్థితి ఆందోళనకరంగా ఉందని వస్తున్న సమాచారం నేపథ్యంలో తక్షణమే వైద్య చికిత్స నిమిత్తం ఆయన్ను హైదరాబాదులోని ఏఐజి వైద్యశాలలో గాని లేదా ఢిల్లీలోని ఏయిమ్స్ వైద్యశాలకు తరలించాలని టిడిపి రాష్ట్ర పరిశీలకులు, ప్రకాశం జిల్లా టిడిపి అధికార ప్రతినిధి శాసనాల వీరబ్రహ్మం ప్రభుత్వాన్ని డిమాండ్ చేశారు. చంద్రబాబు విడుదల కోరుతూ టిడిపి ఆధ్వర్యంలో శుక్రవారం నరసరావుపేటలో ధర్నా కార్యక్రమం జరిగింది. ఈ సందర్భంగా ముఖ్య అతిథిగా హాజరైన శాసనాల మాట్లాడుతూ స్కిల్ డెవలప్మెంట్ ద్వారా రాష్ట్రంలో కొన్ని వేల మందికి వృత్తి నైపుణ్యానికి సంబంధించి శిక్షణ ఇచ్చి వారిలో జీవన ప్రమాణాలను పెంపొందిస్తే, మరోవైపు రాష్ట్ర ప్రభుత్వం అందులో నిధులు గోల్మాల్ జరిగాయని, కుట్రపూరితంగా అక్రమ కేసులు బనాయించి చంద్రబాబును అకారణంగా జైల్లో వేయించిన ముఖ్యమంత్రి జగన్ కు ప్రజలు తగిన గుణపాఠం చెప్పే రోజు త్వరలోనే వస్తుందని హెచ్చరించారు. స్కిల్ డెవలప్మెంట్ వ్యవహారంలో ఒక్క రూపాయి కూడా అవినీతికి ఆస్కారం లేదని అర్థమైనప్పటికీ, రాష్ట్ర ప్రభుత్వం ఉద్దేశపూర్వకంగానే అక్రమ కేసులు బనాయించి భయభ్రాంతులకు గురిచేయాలని చూస్తుందని రాష్ట్ర ప్రభుత్వ వైఖరిని తీవ్రంగా విమర్శించారు. చంద్రబాబు గత 33 రోజులుగా జైల్లో ఉన్నారని, ఆయనకు సౌకర్యాలు అందించే విషయంలో రాష్ట్ర ప్రభుత్వం నిర్లక్ష్యం ప్రదర్శిస్తుందని విమర్శించారు. 14 సంవత్సరాలపాటు ఉమ్మడి రాష్ట్రానికి, ఐదు సంవత్సరాలపాటు ఏపీ రాష్ట్రానికి ముఖ్యమంత్రిగా మరో 15 సంవత్సరాలపాటు ప్రతిపక్ష నాయకుడిగా రాష్ట్ర ప్రజలకు, ఎన్డిఏ, యునైటెడ్ ఫ్రంట్ కన్వీనర్లు గా అటు దేశ ప్రజలకు విశిష్ట సేవలు అందించిన చంద్రబాబు అరెస్టు పట్ల యావత్తు సమాజం తీవ్ర ఆందోళన చెందుతుందని అన్నారు. 74 సంవత్సరాల వయసులో కూడా రాష్ట్ర ప్రజల అభివృద్ధి కోసం తపించి పోరాటం చేస్తున్న చంద్రబాబుకు అనారోగ్య సమస్యలు ఏమైనా తలెత్తితే అందుకు రాష్ట్ర ప్రభుత్వమే పూర్తిగా నైతిక బాధ్యత వహించాల్సి వస్తుందని ఆయన హెచ్చరించారు. చంద్రబాబును విడుదల చేయాలని కోరుతూ కులాలకు, మతాలకు, పార్టీలకు, వర్గాలకు రహితంగా అన్ని వర్గాల ప్రజలు రోడ్డు పైకి వచ్చి పెద్ద ఎత్తున పోరాటాలు కొనసాగిస్తున్నారని ఆయన అన్నారు. వచ్చే ఎన్నికల్లో ఓటమి భయంతోనే ముఖ్యమంత్రి జగన్ ప్రతిపక్ష పార్టీకి చెందిన నాయకులను అక్రమంగా అరెస్టులు చేసి తద్వారా రాజకీయ లబ్ధి పొందాలని చూస్తున్నారని, అయితే ఈ కుట్రలను రాష్ట్ర ప్రజలు గమనిస్తున్నారని అన్నారు. గత నాలుగున్నర సంవత్సరాల వైసిపి ప్రభుత్వం అవలంబించిన విధానాల ఫలితంగా ప్రజలు అనేక ఇబ్బందులను ఎదుర్కొన్నారని, దీంతో విసుగెత్తి పోయారని అన్నారు. వచ్చే ఎన్నికల్లో రాష్ట్రంలో టిడిపి ఘన విజయం సాధించడం ఖాయమని, తిరిగి ముచ్చటగా మూడోసారి ముఖ్యమంత్రిగా చంద్రబాబు నాయుడు కానున్నారని టిడిపి జిల్లా అధికార ప్రతినిధి శాసనాల వీరబ్రహ్మం ధీమా వ్యక్తం చేశారు.