కమిటీ వేశారు.. రిపోర్టు ఎక్కడ?
గత ఏడాది డిసెంబరులో ప్రభుత్వం ఉద్యోగుల సమస్యల పరిష్కారం కోసం ఇంటర్నల్ కమిటీ ఏర్పాటు చేసింది. అయితే ఇప్పటివరకు ఆ కమిటీ నివేదిక ఇవ్వకపోవడం ఉద్యోగుల్లో తీవ్ర ఆగ్రహానికి దారితీసింది.
“మంత్రి గారు మీరు చొరవ తీసుకొని PR కమిషనర్‌తో మాట్లాడితేనే సమస్య పరిష్కారం అవుతుంది” అని సంఘం ప్రతినిధులు స్పష్టం చేస్తున్నారు.
జీతాలు ఆగిపోయాయి – సంక్షేమం నిలిచిపోయింది
ప్రస్తుతం ఉద్యోగులు నెలకు కేవలం ₹13,000 నుండి ₹15,865 మాత్రమే పొందుతున్నారు.
2019లో ఒకసారి పెంచిన జీతాలు, ఆ తర్వాత ఆరు సంవత్సరాలుగా ఒక్క రూపాయి కూడా పెరగలేదు.
ఇదికాక, “ప్రభుత్వ ఉద్యోగులు” అని చూపుతూ అమ్మఒడి, రేషన్ కార్డులు, పెన్షన్ వంటి సంక్షేమ పథకాలు కూడా ఆపేశారు.
దాదాపు 2,000 మంది ఉద్యోగులు, వారి కుటుంబాలు అరణ్య రోదనం చేస్తున్నాయి.
FTE మార్పు లేక నష్టం
మూడేళ్లు పూర్తయ్యాక అవుట్ సోర్సింగ్ ఉద్యోగులను FTEలుగా మార్చాలి. కానీ తొమ్మిది సంవత్సరాలు గడిచినా ఇంకా మార్పు జరగలేదు.
“మూడేళ్లకే FTE చేస్తే ఇప్పటికి ఆరు ఇంక్రిమెంట్లు వచ్చేవి. ఇప్పుడు మాకు జరిగిన నష్టాన్ని ఎవరు భరిస్తారు?” అని ఉద్యోగులు ప్రశ్నిస్తున్నారు.
తీవ్ర నిరాశలో ఉద్యోగులు – రోడ్డెక్కే పరిస్థితి
“గత ప్రభుత్వం మా గోడు పట్టించుకోలేదు. ఇప్పుడు మేము ప్రస్తుత ప్రభుత్వంపై ఆశలు పెట్టుకున్నాం. కానీ ఆలస్యం జరిగితే ఉద్యోగులలో తీవ్ర నిరాశ, నిస్పృహ అలుముకుంది. రోడ్డెక్కటం తప్ప మాకు మరో మార్గం కనపడటం లేదు” అని ఉద్యోగులు హెచ్చరిస్తున్నారు.
ప్రభుత్వంపై గంపెడు ఆశలు
“ప్రస్తుత ప్రభుత్వం చొరవ తీసుకుంటేనే పరిష్కారం దొరుకుతుంది. ముఖ్యంగా మంత్రి గారు, ఉప ముఖ్యమంత్రి గారు వెంటనే జోక్యం చేసుకుంటే సమస్యకు ముగింపు లభిస్తుంది” అని ఉద్యోగులు విజ్ఞప్తి చేస్తున్నారు.
అలాగే “పవన్ కళ్యాణ్ గారు.. మేము అరణ్య రోదనం చేస్తున్నాం.. మా కోసం మీరు ఆదుకోండి” అని సంఘాలు పిలుపునిచ్చాయి.
విశ్లేషణ
రాష్ట్రానికి కోట్ల ఆదాయం తెచ్చిపెడుతున్న ఉపాధి సిబ్బందిపై శీతకన్ను చూపించడం విచారకరం. కేంద్రం నుండి భారీ నిధులు వస్తున్నా, నేలమట్టం లో కష్టపడే కార్మికులకు మాత్రం కనీస గౌరవం, న్యాయం అందడం లేదు. సిబ్బంది లేకుండా ఉపాధి పథకం నడవదనే నిజాన్ని ప్రభుత్వం గుర్తించి, వాగ్దానాలకే పరిమితం కాకుండా వెంటనే చర్యలు తీసుకోవాలని ఉద్యోగ సంఘాలు గట్టిగా డిమాండ్ చేస్తున్నాయి.
